偷得浮生一日閒-----士林部落記遊／黃政枝

真久無出外ㄔ亍¹了。雖然在落雨，猶是綴著²家庭團契到苗栗山區泰雅族的士林教會拜訪以撒傳道。

怹³教會抵好整理出一間小小的兒童圖書室，需要一寡圖書，咱的周報一公布，就捐來幾仔百本的囝仔冊，佮幾仔十袋的囝仔衫。這遍的出遊，最大的任務就是將這些物件載去士林教會。一台遊覽車貯到滿滿，致到車開昧緊⁴，三點鐘的行程，四點鐘才開到。佳哉，一路上的笑聲無停，無人感覺著路途遙遠。

車頂的節目先對古早台灣的褒歌開始。「菜豆開花長短條，芎蕉出世就彎曲，娶著歹某真歹調，今暗看破睏椅條」「肉豆開花雙頭翹，阿哥招娘睏椅條，椅條睏了匡腳翹⁵，兩個跌落攬牢牢⁶」。掌聲未煞，就引起博伯仔五十年前學過的囝仔歌，「鳥鼠乾，牽牛牽馬去上山，山裡無馬草，牽去阿婆怹門口、、、」，Khoichi也想起伊的勸世歌，「我來唸歌囉，互恁聽哩，無欲撿錢啊，免著驚哩，勸恁做人得端正，虎死留皮啊，人留名哩」，雖然歌詞無熟，卻是韻味十足，後遍要請伊歌詞先練熟，效果一定加百倍。

阿忠也準備真濟的笑話，「Good Morning」「我是阿忠」有人笑到攬心肝，有人搞不清伊講啥。東哥接續加強版，「大舌⁷的阿忠去雜貨店買可樂，伊問一罐若濟⁸？頭家講『五十』，伊講『開、開、開』頭家就噗一聲開落去，阿忠繼續講『開、開、開、開玩笑！』。頭家閣問欲幾罐？阿忠講『si、si、si』頭家就包四罐，阿忠這時才講煞『si、si、si、吸管』」。全車笑到卟卟跳，干單⁹伊家己無笑，確實是冷面笑匠。

春天姊仔插花仔，「阿忠伯這工騎機車戴口罩去銀行，接待小姐給伊講『阿伯，你先抽牌仔，再褪口罩一下』，阿忠伯仔驚一下，講『咳！當時規定入來銀行要褪褲走一下？』」阿枝仔無認輸，「阿忠伯這早起去早餐店買饅頭，小姐問伊講，『阿伯，欲加蛋(國語)無？』阿伯應好，『我佇這等』，小姐講，『加蛋加十元』，阿忠伯仔閣驚一下，講『這等加錢，按呢，我來外口等！』

猶有其他的兄姐講笑話，一時記昧了，東哥續接唱伊的台東調，「欲去台東花蓮港，路途生疏仔喂毋識人，希望阿娘仔來疼痛，疼痛阿哥喂出外人」，歌聲柔美悠揚，哪個少女昧動情，莫怪當年¹⁰買嫂赫緊¹¹就互伊諞去。  

一路就按呢笑到食中晝¹²的餐廳。

一面聽笑詼，我一面嘛在欣賞窗外的媠¹³風景。士林教會佇苗栗泰安鄉的深山內，入山了後，車路沿著大安溪，一山盤過一山，溪埔真闊，全溪石，有大粒，也有細粒，有散散的柴箍¹⁴，嘛有膏膏的淥糊糜¹⁵，可是溪水真細港，濁閣湍流，看起來山頂抵才落過大雨。兩爿的山壁，親像刀削，斜插入溪中；白茫罩佇山腰，罩佇山頂，款款¹⁶浮動，加添幾分的幽靜佮神秘。不時有白色的水沖¹⁷對深綠色的樹林中瀉落，有一節、有二節，親像一條幼絲帶佇半空中隨風輕輕搖動。

佇溪水轉彎的所在，有閣較闊的溪埔，佇較高的溪埔，常常有一簇一簇的莊社，有的厝起了真四序18，有的是簡單的竹仔壁、鐵皮厝，厝前後有檳榔樹、有桃子、李子的果樹，車開較偎的時，看會著各種莊腳定定有的花花草草，景象親像細漢時的記持，感覺真親切。

無必要名勝古蹟，佇上帝所創造美麗的台灣的每一個角落，攏會當找著平凡中的媠景緻，找著細漢時美麗的記持，找著細漢時溫暖的感覺。滿足的心情，煞昧記得今仔日出遊的行程。

註

1ㄔ亍: chhit-tho5,或thit-tho5, 遊玩。

2綴著: toe3-tioh8: 跟著。

3怹: in: 他們。

4開昧緊: khui- be7-kin2: 開不快。

5匡腳翹: khong7-kha-khiau3: 椅子向後翻倒。

6攬牢牢: lam2-tiau5-tiau5: 抱得緊緊。

7大舌: toa7-chih8: 口吃,說話絕結巴巴。

8若濟: goa7-che7: 多少。

9干單: kan-dann: 只有。

10當時: tang-si5: 何時。

11赫緊:hiah-kin2: 那麼快。

12中晝: tiong-tau3: 中午。

13媠: sui2: 美麗。

14柴箍: chha5-kho: 木塊, 指漂流木。

15淥糊糜: lok8-koo5-moe5: 爛泥巴。

16款款: khoann-khoann: 緩緩。

17水沖: chui2-chhiang5: 瀑布。

18四序: su3-si7: 妥適, 妥當。