嘴掩的話/黃政枝

當中國武漢疫情初爆發的時,台灣政府真緊張,蘇貞昌院長為著顧全防疫工作,宣布停止嘴掩出口。這個宣布隨惹起一寡心不在台灣的政治人物佮藝人大聲罵,講是無人性。蘇院長的解說是,全台灣的嘴掩日產量是180萬片,外銷約100萬片,若無停止出口,80萬片是絕對無夠台灣2500萬人的使用,若無先保全家己的命是無法度幫助別人。

續接政府馬上組成嘴掩國家隊,生產機器,增加嘴掩產量,佇四十工內完成100台新機器,嘴掩的日產量增加到1300萬片。國人同胞用實名制買嘴掩,一開始七工二片,後來七工三片,閣來十四工九片,基本上會當應付需要。這時,看著外國的疫情越來越嚴重,蔡英文總統宣布講欲贈送外國1000萬片嘴掩,協助怹的醫療人員對抗疫情。這個宣布又閣有人出聲反對,講是台灣人猶閣要排隊買嘴掩,為什麼欲送國外?

諸個話聽起來親像淡薄仔有道理,毋過咱若靜心想看覓。十四工九片,雖然無夠一工一片,若比起全世界欲買一片嘴掩都真困難的人,咱已經真幸福啦!

人佇福中要知福、惜福,若對照其他國家無嘴掩通保護的人,尤其連醫護人員都無夠嘴掩的人,咱實在毋通過頭嫌嘴掩無充足。有時抵著大災難,咱會捐一日所得加減幫助人,毋是講咱好額,錢開昧完,是講咱體會人的困難,只要家己稍儉一下,量出一寡氣力就會幫助當在需要的人。

仝款,咱每二禮拜儉一、二片嘴掩幫助迫切需要的人,敢講咱無這個心?敢講咱一定要計較家己食到飽才願意施捨枵(iau)餓欲死的人?
評論: 0 | 引用: 0 | 閱讀: 393