地獄佮天堂 (台語文)／黃政枝

有一個故事按呢講，有一位原住民的頭目拜訪一位宣教師，請教有關基督教地獄佮天堂的真實性，並且要求宣教師挈伊去參觀。宣教師聽了非常受氣，就用粗魯的話侮辱伊。頭目受人侮辱閣較受氣，就舉刀欲刣，宣教師趕緊逃入房間內。頭目面露兇惡，舉刀追入，宣教師覕佇柱子後大聲緊喝：「你看，你看，這就是地獄！」

頭目聞言，忽然大悟，就見誚閣誠懇跪落會失禮，求宣教師原諒，宣教師微微仔笑講：「你看，這就是天堂！」

原來天堂抑是地獄，是在佇人的一念之間。心存寬容，滿有愛心，就是立佇天堂；若是心存怨恨，惡言暴力，就是踏入地獄。人毋是死了才會入天堂，若有愛心，在生的時，伊的內心，伊的家庭就是一個小小的天堂。