幸福/黃政枝

頂禮拜柏威佇荊棘團契分享參觀Google佮Facebook總部的心得。有講著這二間公司有提供員工真好的福利,有歇睏的所在,有運動的場所,免費的三頓,各種口味的餐廳,隨時據在你食,閣會當包返tńg)去予厝內的人食。因為怹(in)想講若是員工返去厝裡要閣款暗頓,毋值(m̄-ta̍t)著將煮飯的時間省起來辦公事,伊對公司所創造的利益應該大過所包返去的菜錢。對員工來講,這當然是省去真濟的麻煩,也是公司對員工的體貼。

柏威講這減採也是台北市政府所表揚「幸福企業」的一種。卻是,在場有人回應講,佇高科技公司上班並無一定是表面上所看著的風光。

雖然待遇真好,毋過怹的上班時間真長,工作的壓力真大,常常七少年八少年就白頭毛,甚至無到四五十歲就過勞死。這種用性命換財富,敢算是「幸福」? 就引起一陣什麼是「幸福」的討論。

什麼是「幸福」?互我想起過去聽過的一個故事。

人人攏在辛苦追求幸福,到底「幸福」是什麼?一隻狗真好奇就去問上帝,什麼是「幸福」?伊想欲了解到底是什麼物件值得人用性命去追求? 上帝講:「幸福真簡單,就是你的尾溜啊!」狗就越(oa̍t)頭看伊的尾溜,當伊越正爿(pêng),尾溜就撇向倒爿;伊越倒爿(pêng),尾溜就撇向正爿;伊較(khah)出力越,尾溜就閣較大力撇向另外一爿。狗越來越去,踅(se̍h)歸工,舞到歸身軀汗,總是,「幸福」攏是佇親像看會著,卻看昧(bē)清楚的所在。狗真失望,閣去問上帝,為什麼「幸福」這呢難揣(oh-chhōe)?

上帝笑笑回講:「幸福毋是用揣(chhōe)的,只要你腳踏實地,一步一步安心向前行,幸福就會穩穩綴(tòe)佇你後壁!」
評論: 0 | 引用: 0 | 閱讀: 542