訂閱
上一篇
返回
下一篇
松年團契2018花東旅遊／黃政枝
作者: 東門教會 日期: 2018-07-01 20:13
松年團契慣例每年有辦旅遊，今年原本安排去日本，卻是可能大部分人去日本親像行灶腳，致使報名並無踴躍，無法度成團。後來想起花東地區因為中國團減少，觀光業抵著困境，有需要家己同胞支持，就按呢轉方向安排了這次的花東三日遊。
普悠瑪火車雖然有較趒(tiô)，到花蓮只要二點捅(thóng)鐘，算來真緊，食中晝猶真早。下晡先去豐濱天空步道，這是古早花蓮落台東行海邊石壁的古道，古道佇石壁的半空中，幾十尺下就是太平洋，彼時路面窄，要貼壁行，海風呼呼叫，海湧嘩嘩吼。聽說有一位老母偝(āiⁿ)細子過這條古道，佇孤單無伴驚惶中，細子掉落海中家己猶毋知影，所以這條步道又稱「親不知子」步道。現時步道有鋪玻璃板，號稱天中步道，可惜真短，只有一二十公尺，無法度體會先民行古道彼種淒涼的心情。
下一個景點是牛山呼庭，呼庭是原住民語，牛埔的意思。這是私密的風景點，頭前是太平洋，後壁是青翠的山坪，真幽靜的所在，「沉默」這片電影就是佇茲(chia)拍的。
第二工早起參觀林田山林業文化園區，這是日本時代開採高山木材的小莊社，有宿舍群，活動的會堂，高山鐵路等等。部分的宿舍保存了真好，可惜有的破爛，鐵路已經荒廢，若會當坐一段高山火車遊覽山頂的風景，也通體會當年的盛況，相信會吸引較濟遊客。
馬太鞍濕地佇中央山脈的山腳，山頂流落來的水匯集佇茲(chia)，地下水充足，濕地生態豐富。馬太鞍是原住民語，樹豆的意思，聽講食樹豆會生查甫，阿美族人無愛食，因為怹(in)是母性社會，查某較值錢。在地的拉藍老師介紹原住民特別的「巴拉告」掠魚法，怹用樹枝佮竹管起三層的厝互魚類住。底層是竹管，互無穿衫的鱔魚、鰻，魚鰡住；中層是樹枝，互蝦子、毛蟹住，頂層是竹枝，互有鱗的草魚、吳郭魚住。頂層大魚食賸(chhun)的食物卡佇中層的樹枝，成做蝦子的點心，抑是掉落底層互魚鰡食。這種生態的飼魚法，毋免出海掠魚，也免辛苦釣魚，是馬太鞍阿美族人的生活智慧。
阮對花東縱(chhiòng)谷拉車落台東，中間有斡(oat)入去聞名的伯朗大道，因為長年交通管制，遊覽車只會當停佇外圍，若欲去看金城武樹，行路來回需要四五十分鐘，時間上無允准，阮只好遠遠遙望。後禮拜就是五月節，稻子已經結穗飽飽，放眼看去，一望無際，稻田直到天邊山腳，滿地金黃色的稻穗隨風搖擺，足難得的景色。有商家出租電動腳踏車，當時因為時間的限制，阮無租車。如今回想，既然一畷(chōa)路來到此地，閣正逢稻子飽穗待割之時，應該把握難得的機會，租一台腳踏車，綴(tòe)著稻香味，騎入雙爿金黃色直直通到天邊的天堂路，翕(hip)一張坐佇金城武樹腳飲咖啡悠哉悠哉的相片，按呢才無枉費到此一遊！
下一站是鹿野高台，這是坐熱氣球佮飛行傘的熱門所在，阮到的時間欲偎暗頭仔，已經無其他的遊客，所以無感受著鬧熱的氣氛。對觀景台看落去，花東縱谷的田園景緻盡在眼下，立(khiā)佇高台，清風吹來，有一種「振衣千仞嶺」的快感。
食暗飽返到飯店，幾年前東門教會差派到台東服務的劉漢鼎醫師以及雅欣佮佩玲二位護理師來相揣(chhōe)，怹佇台東就近照顧癌症病人，免得病人盤山過嶺來台北就醫的路途奔波之苦。這種放棄台北舒爽的生活，甘願長期到後山偏鄉服務的犧牲精神，互人敬佩。
第三工透早參觀公東教堂，通常禮拜四是休館日，阮是拜託盧牧師特別安排專人導覽。教堂是六十年前起造，採用清水模板方式，無樑無柱，自然光線，簡約樸實，粗線條中帶著詩意，是專家謳咾有著的建築物，也是建築系學生畢業前一定要參拜的所在。
後一站是富源景觀平台，佇茲(chia)會當360度看台東，甚至看到蘭嶼佮綠島，可惜今仔日抵著小雨，山頂霧氣真重，只看著一片茫茫！
輕鬆的日子總是過得真緊，佇原生植物園食完養生「汆燙鍋」的中晝頓，就前往台東車頭坐火車返來台北，也結束三日花東的輕鬆旅遊。
出門前氣象報導是大雨，甚至是災難性的大雨，前一暗花蓮閣有四級地動，有團員擔心安全問題，感謝上帝保守，松年團契這些序大是歡歡喜喜出門，平平安安閣快快樂樂返來。
普悠瑪火車雖然有較趒(tiô)，到花蓮只要二點捅(thóng)鐘，算來真緊，食中晝猶真早。下晡先去豐濱天空步道，這是古早花蓮落台東行海邊石壁的古道，古道佇石壁的半空中，幾十尺下就是太平洋，彼時路面窄，要貼壁行，海風呼呼叫，海湧嘩嘩吼。聽說有一位老母偝(āiⁿ)細子過這條古道，佇孤單無伴驚惶中，細子掉落海中家己猶毋知影，所以這條步道又稱「親不知子」步道。現時步道有鋪玻璃板，號稱天中步道，可惜真短，只有一二十公尺，無法度體會先民行古道彼種淒涼的心情。
下一個景點是牛山呼庭，呼庭是原住民語，牛埔的意思。這是私密的風景點，頭前是太平洋，後壁是青翠的山坪，真幽靜的所在，「沉默」這片電影就是佇茲(chia)拍的。
第二工早起參觀林田山林業文化園區，這是日本時代開採高山木材的小莊社，有宿舍群，活動的會堂，高山鐵路等等。部分的宿舍保存了真好，可惜有的破爛，鐵路已經荒廢，若會當坐一段高山火車遊覽山頂的風景，也通體會當年的盛況，相信會吸引較濟遊客。
馬太鞍濕地佇中央山脈的山腳，山頂流落來的水匯集佇茲(chia)，地下水充足，濕地生態豐富。馬太鞍是原住民語，樹豆的意思，聽講食樹豆會生查甫，阿美族人無愛食，因為怹(in)是母性社會，查某較值錢。在地的拉藍老師介紹原住民特別的「巴拉告」掠魚法，怹用樹枝佮竹管起三層的厝互魚類住。底層是竹管，互無穿衫的鱔魚、鰻，魚鰡住；中層是樹枝，互蝦子、毛蟹住，頂層是竹枝，互有鱗的草魚、吳郭魚住。頂層大魚食賸(chhun)的食物卡佇中層的樹枝，成做蝦子的點心，抑是掉落底層互魚鰡食。這種生態的飼魚法，毋免出海掠魚，也免辛苦釣魚，是馬太鞍阿美族人的生活智慧。
阮對花東縱(chhiòng)谷拉車落台東，中間有斡(oat)入去聞名的伯朗大道，因為長年交通管制，遊覽車只會當停佇外圍，若欲去看金城武樹，行路來回需要四五十分鐘，時間上無允准，阮只好遠遠遙望。後禮拜就是五月節，稻子已經結穗飽飽，放眼看去，一望無際，稻田直到天邊山腳，滿地金黃色的稻穗隨風搖擺，足難得的景色。有商家出租電動腳踏車，當時因為時間的限制，阮無租車。如今回想，既然一畷(chōa)路來到此地，閣正逢稻子飽穗待割之時，應該把握難得的機會，租一台腳踏車，綴(tòe)著稻香味，騎入雙爿金黃色直直通到天邊的天堂路，翕(hip)一張坐佇金城武樹腳飲咖啡悠哉悠哉的相片，按呢才無枉費到此一遊！
下一站是鹿野高台，這是坐熱氣球佮飛行傘的熱門所在，阮到的時間欲偎暗頭仔，已經無其他的遊客，所以無感受著鬧熱的氣氛。對觀景台看落去，花東縱谷的田園景緻盡在眼下，立(khiā)佇高台，清風吹來，有一種「振衣千仞嶺」的快感。
食暗飽返到飯店，幾年前東門教會差派到台東服務的劉漢鼎醫師以及雅欣佮佩玲二位護理師來相揣(chhōe)，怹佇台東就近照顧癌症病人，免得病人盤山過嶺來台北就醫的路途奔波之苦。這種放棄台北舒爽的生活，甘願長期到後山偏鄉服務的犧牲精神，互人敬佩。
第三工透早參觀公東教堂，通常禮拜四是休館日，阮是拜託盧牧師特別安排專人導覽。教堂是六十年前起造，採用清水模板方式，無樑無柱，自然光線，簡約樸實，粗線條中帶著詩意，是專家謳咾有著的建築物，也是建築系學生畢業前一定要參拜的所在。
後一站是富源景觀平台，佇茲(chia)會當360度看台東，甚至看到蘭嶼佮綠島，可惜今仔日抵著小雨，山頂霧氣真重，只看著一片茫茫！
輕鬆的日子總是過得真緊，佇原生植物園食完養生「汆燙鍋」的中晝頓，就前往台東車頭坐火車返來台北，也結束三日花東的輕鬆旅遊。
出門前氣象報導是大雨，甚至是災難性的大雨，前一暗花蓮閣有四級地動，有團員擔心安全問題，感謝上帝保守，松年團契這些序大是歡歡喜喜出門，平平安安閣快快樂樂返來。
評論: 0 |
引用: 0 |
閱讀: 1005
