什麼是你所有 ?/黃政枝

頂禮拜牧師的講道題目是「無知的財主」,引用路加福音十二章16-21節的經文。講道的重點是,人的活命不在伊所積聚的豐盛,因為無論伊積聚若濟(jōa-chē,多少),一旦上帝取回伊的生命,所有的錢財,所有的江山,攏是別人的。謹守上帝所允准的份額是一種祝福,若是過度追求超過需要的積聚便是貪心。人目珠一瞌(kheh),雙手是空空,生不帶來,死不帶去。

這篇講道互我想起一篇網路流傳的故事。
有一個人過身。當伊發現家己已經過身,伊看見上帝手捾(kōaⁿ)一只茭艋(kha-báng,手提箱,荷蘭語),向伊行偎來。
上帝:「子啊,時間到了,咱該啟程。」
人:「這呢緊?我猶有真濟的計畫...」
上帝:「真歹勢,毋過(m̄-kò)時間已經到了,咱該啟程。」
人:「你的茭艋內底貯(té)什麼物件?」
上帝:「你的物件。」
人:「我的物件?你是講我的物件?我的衫褲...我的錢財...」
上帝:「彼些物從來都毋是你的。怹(in)歸佇土地。」
人:「敢是我的記持(kì-tî,記憶)?」
上帝:「毋是,怹歸佇時間。」
人:「是我的才能?」
上帝:「毋是,怹歸佇環境。」
人:「是我的朋友佮親人?」
上帝:「毋是,子啊,怹歸佇你所行過的路站。」
人:「是我的某子?」
上帝: 「毋是,怹歸佇你的心。」
人:「按呢,是我的肉體?」
上帝:「毋是,毋是,伊歸佇塵土。」
人:「按呢,一定是我的靈魂?」
上帝:「子啊,真遺憾,你的靈魂歸佇我。」
人真驚惶,含(kâm)著目屎,接過上帝的手,打開茭艋...
內面空空 !!!
人,心攏碎去,目屎四淋垂,問上帝 : 「我無暝無日打拼一世人,敢無任何物件屬過我?」
上帝:「這就著啦,你毋曾有過任何物件。」
人:「按呢,什麼是我的?」
上帝:「你的時刻!你活著的每一個時刻是你的!」
評論: 0 | 引用: 0 | 閱讀: 1304